प्रधानमन्त्रीसँगको भेटपछि दुर्गा प्रसाईंको चेतावनी : ‘माग पूरा नभए चुनाव हुँदैन, जनविद्रोह हुन्छ’

विचार

गृहपृष्ठ
विचार

जनमतसंग्रह प्रधानमन्त्रीसँगको भेटपछि दुर्गा प्रसाईंको चेतावनी : ‘माग पूरा नभए चुनाव हुँदैन, जनविद्रोह हुन्छ’

नेपालकभर मंगलबार, मंसिर २४, २०८२

काठमाडौँ ।

नागरिक बचाउ दलका संरक्षक दुर्गा प्रसाईंले आफ्ना माग पूरा नभए देशमा जनविद्रोह हुनसक्ने चेतावनी दिएका छन्। सोमबार साँझ सिंहदरबारमा अन्तरिम सरकारका प्रधानमन्त्री सुशीला कार्कीसँग भएको भेटपछि पत्रकारहरूसँग कुरा गर्दै प्रसाईंले आगामी प्रतिनिधि सभा चुनावसमेत रोकिन सक्ने दाबी गरे।

प्रसाईंका अनुसार प्रधानमन्त्रीसँगको भेटमा उनीहरूले राखेका मागहरू स्पष्ट रूपमा प्रस्तुत गरिएको थियो। “हाम्रा सबै माग जनजीविकासँग सम्बन्धित छन्,” उनले भने, “प्रधानमन्त्री र गृहमन्त्रीले ध्यानपूर्वक सुन्नुभयो। उहाँहरूले पुस २ गते निर्णय दिने बताउनुभएको छ।”

प्रसाईंले २०६२/०६३ को जनआन्दोलनले संघीयता, धर्मनिरपेक्षता वा राजतन्त्रको अन्त्य गर्ने जनमत नदिएको जिकिर गर्दै यी सबै विषयमा जनमतसंग्रह आवश्यक रहेको दोहोर्याए। उनका अनुसार राजनीतिक परिवर्तनका जटिल गाँठा “जहाँ परेको हो त्यहीं फुकाउनुपर्ने” समय आएको छ।

सरकारले तय गरेको फागुन २१ गतेको प्रतिनिधि सभा निर्वाचन तोकिएको समयमा नहुने दाबी गर्दै प्रसाईंले भने, “व्यवस्थाकै वैधता प्रश्नमा छन्। सही निर्णय आएन भने चुनाव हुँदैन। जनताले व्यवस्था कस्तो चाहन्छन्—त्यसका लागि जनमतसंग्रहमा जानुपर्छ।”

किरात, बौद्धसहितको ‘हिन्दु अधिराज्य’, राजसंस्थाको पुनर्स्थापना र वर्तमान व्यवस्थाको विकल्पबारे पनि जनमतसंग्रह गर्नुपर्ने माग आफूहरूले राखेको उनले स्पष्ट पारे।

प्रकाशित मिति: मंगलबार, मंसिर २४, २०८२ ०६:४१