ओखलढुङ्गा विपद् व्यवस्थापन समाजद्वारा ज्ञानज्योति माध्यमिक विद्यालयमा झोला वितरण।

शिक्षा

गृहपृष्ठ
शिक्षा

झोला वितरण ओखलढुङ्गा विपद् व्यवस्थापन समाजद्वारा ज्ञानज्योति माध्यमिक विद्यालयमा झोला वितरण।

नेपालकभर मंगलबार, माघ ७, २०८२

लिखु–२, कुवापानी, ओखलढुङ्गा

ओखलढुङ्गा विपद् व्यवस्थापन समाजको आयोजनामा कुवापानीस्थित ज्ञानज्योति माध्यमिक विद्यालयका विद्यार्थीहरूलाई लक्षित गरी झोला वितरण कार्यक्रम सफलतापूर्वक सम्पन्न भएको छ।

कार्यक्रम विद्यालय व्यवस्थापन समितिका अध्यक्ष निरण बुढाथोकीको अध्यक्षतामा सम्पन्न भएको हो। कार्यक्रमको सञ्चालन शिक्षक कृष्ण दाहालले गर्नुभएको थियो। कार्यक्रममा अभिभावक, शिक्षक, विद्यार्थी, समाजसेवी तथा स्थानीय बासिन्दाहरूको उल्लेखनीय सहभागिता रहेको थियो।

कार्यक्रमलाई सम्बोधन गर्दै समाजका अध्यक्ष गुरु केदार बराल—जो पोकली झरना सेवा समाजका संस्थापकसमेत हुन्—ले विद्यार्थीहरूको शैक्षिक विकासमा सहयोग पुर्‍याउने उद्देश्यले झोला वितरण कार्यक्रमलाई निरन्तरता दिइने बताउनुभयो।

उहाँले भन्नुभयो,

“विद्यार्थीहरूको शैक्षिक स्तर सुधार गर्नु हाम्रो मुख्य लक्ष्य हो। आज वितरण गरिएका झोला र सहयोगले उनीहरूको पढाइ, अनुशासन र आत्मविश्वासमा सकारात्मक प्रभाव पार्नेछ। जीवनमा सत्य बोल्ने, काम समयमै गर्ने र अनुशासित हुने गुणहरू अपनाउन सके विद्यार्थी मात्र होइन, समाज र राष्ट्र नै सबल बन्छ।”

उहाँले कार्यक्रममा प्रस्तुत गरिएको सांस्कृतिक झाँकीमा सहभागी विद्यार्थीहरूको विशेष प्रशंसा गर्दै यस्ता गतिविधिले सिर्जनशीलता, आत्मविश्वास र सहकार्यको भावना विकास गर्ने उल्लेख गर्नुभयो।

कार्यक्रममा अधिवक्ता सुरेन्द्र बोगटीले आफूले यही विद्यालयमा अध्ययन गरेको स्मरण गर्दै विद्यालयप्रति आफ्नो भावनात्मक सम्बन्ध रहेको बताउनुभयो। उहाँले विद्यालयलाई भविष्यमा उच्चस्तरीय भवन निर्माणका लागि पहल गर्ने प्रतिबद्धता व्यक्त गर्नुका साथै झोला वितरण कार्यक्रममार्फत शैक्षिक सहयोग प्रदान गर्न पाएकोमा खुशी व्यक्त गर्नुभयो।

कार्यक्रमले विद्यालय, अभिभावक र समाजबीचको सहकार्यलाई थप सुदृढ बनाएको सहभागीहरूले बताएका छन्।